توفي إلي رحمة الله الطفل ياسين.... مش مهم
علي فكرة إسمه ياسين إيه... مش هتفرق.... ممكن تلاقي إسمه بالكامل على النت في
فيسبوك و تويتر.... هتلاقي صورته كمان.... هو ببساطة شبه إبني و إبنك و ولاد أختك
و إبن جارك الشقي.... شبه عيالنا و منهم
ياسين مات فى حادث سيارة أتوبيس مدرسته..... ناس
بتقول ان الأتوبيس مكنش بيتعمله صيانة و ناس بتقول إنه كان بيجري و ناس بتقول
حاجات تانية.... ممكن يكونوا علي حق و ممكن يكونوا بيقولوا كلام عن ظن و هو أغلب
الظن.....
تعالوا نعمل هاشتاج و نلطم و نحرق قلب أهله
عليه أكثر مما هو محروق..... أو تعالوا نعمل وقفة إحتجاجية أمام المدرسة محدش عارف
هي بتطالب بإيه..... أو تعالوا نعمل كل دة و علي أجازة الخميس الجاي كله ينسى و
نسيب أهل ياسين يأكلهم الحزن حتي يموت سيف, أو عبد الله, أو أحمد أو سلمي...... ثم
نعيد الكرة..... و أهو اللى بيموت بيرتاح
.
.
.
.
.
أو نحاول نعمل حاجة إيجابية........... ياسين
مات.... أنا معرفش سبب وفاته المباشر إيه! جايز السرعة أو الفرامل أو حتي الطريق
السئ أو السواق نام..... بس إبنك بيروح المدرسة... أيوة..... إبنك إنت..... ممكن
يبقي مكانه
على فكرة, في 4 من زملاء ياسين فى العناية
المركزة..... ممكن قوي يكون ياسين أفضلهم حظا..... الموت مأساة, و لكن فى مصر,
أحيانا يكون الموت أفضل من بعض الحياة خصوصا لو لديك بعض المشاكل الصحية
تعالوا نزعل و نصوت و نشتم..... بس ممكن
نحاول نلاقي حل؟
ممكن أقترح مشروع إنقاذ لإبني و بقية زملاء ياسين؟
أولا: ممكن نعرف سبب الحادث بوضوح و من تقرير
رسمي؟ حادث أتوبيس مدرسة مات فيه طفل و 4 بإصابات خطيرة أعتقد إنه يستحق تقرير
"أمين" و "حقيقي" من الجهات المسئولة "لو أن هناك فى هذا
البلد جهات و كمان مسئولة أو إن في بلد أساسا"
ثانيا: ممكن السيد رئيس الجمهورية يوجه السيد
رئيس الوزراء يوجه السادة الوزراء المعنيين بتعديل قانون المرور "الآن"
بعدم السماح بترخيص سيارة نقل تلاميذ لا تحتوي علي جهاز تحديد مواقع "GPS" و تحديد سرعة
بما لا يتجاوز 60 كم ساعة و عمل رخصة قيادة مخصوص لسائقي هذه السيارات. و المدرسة
التي لا تلتزم تدفع غرامات تبدأ من مئة ألف جنيه تتضاعف عند العود؟ و ممكن ندي
مهلة 3-6 أشهر لتوفيق الأوضاع
ثالثا: ممكن المدرسة التي تقوم بتسيير سيارات
نقل تلاميذ وقوف أو بعدد أكبر من عدد الكراسي الموجودة بالسيارة تدفع غرامة تبدأ
من مئة ألف جنيه و تتضاعف عند العود؟
رابعا: ممكن نحاول الضغط بكل الوسائل لتنفيذ
دة؟
ممكن تستحملونا كام شهر بس لحد ما ندبر حالنا و نعدكم إننا هنأخد ولادنا
السخفاء الأشقياء و أهاليهم الثقلاء و نرحل لأرض أخري.... استحملونا بس و إحنا
هندعيلكم بإن ربنا يأخدنا و يريحكم
ليست هناك تعليقات:
إرسال تعليق