تقييمي لإستخدام خدمة Uber لأول مرة في مصر

النهاردة كانت اول تجربة استخدم فيها خدمة Uber... لمن لا يعلم هي عبارة ببساطة عن تطبيق على التليفون "برنامج يعني بتنزله ببلاش على موبايلك" من خلاله بتطلب سيارة تقوم بنقلك من مكان لمكان... زي التاكسي لكن مع فروق خرافية....

اولا حضرتك بتطلب السيارة من خلال تطبيق التليفون، مش بتتصل بحد، مجرد بتحط على الخريطة اللي في البرنامج مكان بداية الرحلة "المكان اللي انت فيه او هتركب منه" و مكان نهاية الرحلة "الحتة اللي انت رايحلها"

البرنامج مصمم بحيث يُظهر على الخريطة السيارات المتاحة في دايرة قريبة منك في حدود دقايق "١٠ دقايق بالكثير" لو مفيش عربيّات حواليك في الدايرة دي التطبيق هيقولك جرب بعد شوية

بعد تأكيد الطلب، هتشوف المدة اللي العربية اللي جايالك هتستغرقها و مكانها اللحظي على الخريطة و كمان اسم و صورة و رقم تليفون السائق و رقم و موديل العربية

هتوصلك العربية هتركب و توصلك مطرح ما انت محدد سواء عن طريق ال GPS او انت ممكن تخلي السائق ياخد طريق تاني لو تحب

بعد الوصول هيجيلك طلب لتقييم السائق مصحوب بخريطة للمسار اللي انتوا فعلا مشيتوا فيه ووقت الركوب و الوصول و زمن الرحلة و المسافة و تكلفة الرحلة بالقرش

الخدمة متاحة ف القاهرة من شهور عديدة و بها عدة آلاف من السيارات و في اسكندرية بدأت يوم ٢٧ نوفمبر ٢٠١٥ و لسة عدد السيارات اتنين فقط بس السواق قالي انهم في خلال أسبوعين هيكونوا عشرة

الخدمة دي مناسبة جدا جدا لحاجات كتير، مشاوير المطار، استخدام واحد رايح وسط البلد او مكان مزدحم و مفيش ركنة و دي كانت حالتي النهاردة، استخدام السيدات بأطفالهم للمشاوير بتاعة النادي و كارفور و خلافه لانه آمن جدا... لو حابب تركب وممعكش فلوس لإنك ببساطة مش هتدفع كاش... انت بتسجل الكريديت و الفلوس بتتحول مباشرة من غير تداول بينك و بين السائق... كمان لو نسيت حاجة في العربية مش هتضيع... مش هتفاصل في الحساب و عارف متوسط التكلفة من الأول... لو رايح سهرة أو مسرح أو فيلم و لابسين بدل و سواريهات بقى مش محتاج تسوق و تقرف روحك لإن الخدمة 24 ساعة

التكلفة كانت 32 جنيه بالنسبة لمشوار من جرين بلازا لحد المنشية عند شارع النصر عن طريق الطريق السريع.... أنا مش من مستخدمي التاكسي الأصفر في الأسود التقليدي بس أظن إن التكلفة مش هتكون مختلفة عن كدة مع الوضع في الإعتبار الفارق في نوع السيارة و جودتها و أمان الرحلة "أظن التاكسي العادي مش أقل من 25-30 جنيه لنفس المشوار".

العيوب هي عيوب مصرية بالأساس... الخدمة دي موجودة تقريبا في قارات العالم الست دلوقتي و كل المدن المهمة ف الكوكب... بس طبعا السواق وصلي متأخر لأنه كان جاي من سان ستيفانو و المفروض مكنش يقبل الطلب مدام بعيد "هو استغرق حوالي 20 دقيقة للوصول" و المفروض ان تعليمات Uber أنه ما يكلمش الراكب إلا إذا الراكب كلمه مثلا بس الولد دة - رغم إنه كان لطيف و مهذب الحقيقة- كان بيعمل دعاية عن الخدمة و إنه من القاهرة و إلخخخخخخ كالعادة. العربية كانت نظيفة "كانت جيلي إيميجراند" بس مكنش مشغل التكييف -هو أنا مكنتش هأطلب تشغيله بس هو المفروض يسألك"

أنا مدفعتش فلوس في الخدمة خالص لإن كان عندي Promotion code جايلي فخدت توصيلة لحد 70 جنيه ببلاش... و لما وصلت إدوني كود أديه لحد ما كنش مسجل يسجل به و يأخد كمان توصيلة مجانية ب70 جنيه... يعني حضرتك تنزل الأبليكيشن و تدخل الكود AHMADS1528UE هتأخد برضو توصيلة مجانية في حدود 70 جنيه...

محتاج إيه للتسجيل؟
موبايل سمارت فون عليه نت و GPS و تسجل عندهم الكريديت كارد "طبعا دة بيتم استخدامه من خلال secured network, يعني بيانات البطاقة في أمان تام"

استخدموه بقى و استخدموا الكود دة كمان عشان تجربوا مرة ببلاش و اضربوا التاكسيات المقرفة دي بالصرمة