ليه بلوج؟ مش عارف.... ممكن موضة, أو تقليد أو رزالة...بس الأكيد انه شىء لطيف انه يكون لديك مكان تقول كل اللى انت عاوزه فيه.
و بعدين برضه الواحد يبقى من المدونين......قوم يبقى من النشطاء. و ربنا يكرمنا جميعا انشاء الله زى ما كرم مطاوع.....أو جبر
للإخوة المصابين, اللى هيقروا المدونة دى, تعاطفك لوحده مش كفاية, اتبرع و لو بكومنت....................
أول نوت كتبتها عن الفيس بوك بتعبر عن اللى كنت عاوز أقوله وقتها....و لا تزال تصلح برأيى
كتبت فى 18 أغسطس 2010 أقول
"عمرك شفت مقالة فى جورنال أو حلقة ساخنة من حلقات عمرو أديب ولا منى الشاذلى و حسيت انك نفسك تخش مع العالم دى فى اللعبة و لو من باب الهزار؟؟ يعنى تقول رأيك فى البرنامج أو المقالة و تقاوح و تدافع عن وجهة نظرك؟
أنا بصراحة كدة و ماأعرفشى انتم ظروفكم ايه ,بس أنا أحيان كتير بتاخدنى الجلالة وأفكر فى مقالات كتير فى السياسة و الكورة و الدين و الأدب و قلة الأدب كمان بس ألاقى نفسى مكسل أو مطنش لحدالنهاردة ما قررت من غير مناسبة انى أعمل نوتس و أكتب فيها عن كل حاجة و أى حاجة أنا عايز أقولها
الصراحة فى أكتر من سبب, أولا ان عمل النوتس هنا فى الفيسبوك أسهل من عمل بلوج مثلا و الجمهور هنا كمان موجود بالفعل من الأصدقاء و الزملاء و كمان الوصول لها أسهل كتير للسادة الزملاء من أمن الدولة (علشان أنا ناوى أعك فى السياسة ان شاء الله) و ثانيا لأن النوتس بتاعة صديقى الدكتور خالد كانت ملهمة جدا بالنسبة لى فشجعتنى.و كمان فى الأيام الكحلى اللى احنا فيهادى الواحد عايز يطلع القرف اللى جواه, فبما انى خطى وحش قوى قررت انى اكتب على النت
على فكرة, أكيد ساعات هتكون المقالات مملة أو عبيطة أو جد قوى, بس أمانة عليك يا شيخ و انتىكمان يا حاجة, لو عصرتوا على نفسكم فدان لمون و قريتم مقال للاخر اكتبوا تعليقات برأيكم. مش عايز مجاملات, ومش عايز قلة أدب, عايز رأيكمالحقيقى.........ماشى يا عم الحج.
أشوفكم فى المقالة الأولى قريبا إن شاء الله"
و عليه.............ألقاكم فى المقالة الأولى.....بس قبلها هأنشر كل النوتس بتاعتى من صفحتى فى الفيس بوك مع تواريخ نشرها الأصلية
ليست هناك تعليقات:
إرسال تعليق