نشرت هذه النوت على صفحتى بالفيس بوك فى 18 أغسطس 2010
"حد فاكر أغنية الفنانة "الصاعدة في ذلك الوقت"عفاف راضى (مصرهي أمي)؟ أعتقد إنها كانت من 30 سنة تقريبا أو يزيد. طب ما هى علاقتنا بهذا الأمر؟ أعتقد ان ما فيش حد يجرؤ يغنى الأغنية دى دلوقتى حتى لو معجب بكلامها, خصوصا انه غالبا هيسمع ما لا يرضيه عن الست والدته (اللى هى مصر طبعا فى الأغنية) من طوب الأرض علشان كده أنا حورت الاسم ل"مصر هى أمك" علشان اللى يستظرف الشتيمة تلف تلف و ترجعله.
المهم, ايه المطلوب يعنى؟ أيام الأغنية المذكورة كانت مصر فى نهايات عهد المرحوم السادات و بدايات العهد المبارك, و أيامها أنا كان عندى حوالى 6 سنيين و فاكر كويس ان النور كان بيقطع كتير و ان الميه كمان كانت بتقطع بانتظام يغيظ و على فكرة أيامها اناماكنتش ساكن فى زعربانة, أنا كنت ساكن فى شارع اسمه شارع مرتضى و المفروض انه شارع كويس فى حتة اسمها جناكليس. و فاكر كمان ان التليفون الأرضى (وده النوع الوحيد اللى كان متاح فى الثمانينيات) ركب عندنا بعد قائمة انتظار 6أو 7 سنيين على ما أذكر.
الحمد لله,النهاردة و بعد 30 سنة من العمل و الكفاح و التقدم استطاع نظام الحكم المبارك أني رجع بمصر 3 عقود الى الخلف إزاى؟
فالكهرباء تقطع بال3ساعات عن معظم محافظات الجمهورية. امبارح عمرو أديب استضاف على التليفون الدكتور "خد بالك من الدكتور دى, هه" محمد عوض رئيس الشركةالقابضة للكهرباء و سأله عن الانقطاع المستمرللتيار فى معظم أنحاءالبلاد فأنكر الرجل هذا الانقطاع ببجاحة يحسد عليها ثم عاد وأكد أن المسئول عنه هم الناس باستهلاكهم الشنيع للكهرباء و استخدامهم المفرط للتكييف مما يستحقوا معه حرمانهم من نعمة الكهرباء اللى مايعرفوش قيمتها. الحقيقة أنا أؤيد السيد المسئول فى كلامه, فلو ان الشعب الجاحد الناكر للجميل حط فى عينه حصوة ملح و لم نفسه و رشد استهلاك الكهرباءما كنش ادى فرصة للمسئول الكبير انه يهزئنا بالمنظر ده , بلا قرف شعوب عايزة الحرق!!.
أما الميه, فدى حدوتة تانية خالص, الميه قطعت من 4 أيام, فين يا ولاد ؟؟!! فى القاهرة الجديدة ,سكن الناس ولاد الناس. منظرلطيف لما تلاقى البيه نازل من الجاجور عند عزبة القرود و لا كوبرى الكيلو 4,5 علشان يملى جركن ميه و لا الهانم حرم الباشا نازلة من الشيروكى تملى جردل ميه من البنزينة ......قمة العدل الاجتماعى و المساواة فى العطش.
طبعا ما سبق هو نقطة صغيرة فى بحر انجازات النظام المبارك, بطل العالم فى الجرى فى المحل. هذه الانجازات التى يبدو أن حتى الموت سيفشل فى وقف عجلاتها بعد بداية الحملة الرسميةلترشيح فريد عصره و فلتة زمانه,حساس الجيل..... جيمى!!. كل هذه الانجازاتالمتتالية تجعلنا نغنى بأعلى صوت للنظام المبارك و خلفائه: لامؤاخذه, مصرهى أمك"
ليست هناك تعليقات:
إرسال تعليق